Fering
Poliitsk bilding uun Sleeswik-Holstian
De loonsmaan för poliitsk bilding an sin skööl maage poliitsk bilding för altermaal uun Sleeswik-Holstian! Wi ferstun üüs werk üüs en bidrach diartu at freihaidlik-demokratisk ordning tu stöönin an at poliitsk kultüür tu belewin.
De loonsmaan
Tup mä üüs kooperaschuunsmaakers spikeliare wi nei ideen üt för at börgerbilding an saat jo praktisk am. Bütjen det beriad wi at loonsregiaring an a loondai uun grünjseetelk fraagen am at poliitsk bilding. Diarbi werke wi poliitsk ünufhingig an auer a parteien.
Dr. Christian Meyer-Heidemann wurd faan a sleeswik-holstiansk loondai uun nofember 2015 üüb a grünjlaag faan en uundrach, wat ale rakschuunen mäenöler stääld hed, mä en grat muarhaid weelet. Hee wurd uun oktober 2021 wer keazen. Sin amtstidj düüret seeks juar.
Dr. Christian Meyer-Heidemann (bäären 1980) as befreid an hee tau jongen. Efter sin studium faan wiartskap/politiik an matematiik bi a Christian-Albrechts-Universität zu Kiel wiar’r bi a Universiteen faan Kil an Vechta üüs wedenskapelk mäwerker uunstääld. Efter sin promoschuun am’t teema „Selbstbildung und Bürgeridentität“ hee hi at profesuur för politiikdidaktik bi a Leuphana Universität Lüneburg fertreeden. Bit 2015 fertreed Meyer-Heidemann at profesuur för wiarskaft/politiik an hör didaktik bi a Christian-Albrechts-Universität zu Kiel.
Christian Meyer-Heidemann as lasmaat uun a föörstant faan’t börgerstifting Schleswig-Holsteinische Gedenkstätten.
Üüs apgoowen
Wi bad feranstaltingen an projekten am poliitsk bilding för altermaal uun Sleeswik-Holstian uun. Wi nuadige reegelmiatig tu föördracher, leesingen an diskuschuunsinjer, organisiare workshops an fortbildingen – ei bluat uun a loonshoodsteed, man uk uun’t hial bundeslun. A teemen san bruket! Bitu faan poliitsk fraagen behanle wi uk loonskundlik an historisk teemen. Wi luke auer a loonsgrensen henwech an registriare naschunaal an internaschunaal feranringen mä. Üüs formaaten an metooden maage at mögelk, dat wi üs mä a dialnemern ütjbütje kön. Dön aktuel feranstaltingen finj jam heer (üüb tjiisk).
Uun üüs laaden kön jam buken, broschüüren an öler materiool bestel, saner postkoosten tu betaalin. Uun üüs infoteek finj jam üübtu videos (dialwiis üüb muar spriaken), dokumenten an infografiken, wat jam jam üüb steed beluke kön. A publikaschuunen an infomaterioolen behanle en buul teemen: Tu’n bispal at tjiisk an sleeswik-holstiansk histoore, internasjunaal fraagen üüs europapolitiik an globalisiiring, of aktuel stridjfraagen so üüs digitalisiiring of migratschuun.
Haa jam fraagen of komentaaren tu üüs werk, nem ‘em hal kontakt ap mä üs! Wi frööge üs üüb jau toochter!
Kem’em föörbi!
A loonsmaan för’t poliitsk bilding uun Sleeswik-Holstian
Karolinenweg 1
24105 Kiel
Rep’em üs ap!
0431 988 1646
Postuunskraft
Der Landesbeauftragte für politische Bildung in Schleswig-Holstein
Postfach 7121, 24171 Kiel
Wi haa eeben
Faan mundai tu tüürsdai
Faan a klook 8.00 bit tu a klook 15.00
En freidaiem faan a klook 8.00 bit tu a klook 12.00
Of jam maage mä üs en öler tidj uf.
Skriiw’em üs en bööd: lpb@landtag.ltsh.de